• نوێ

    گورگی برسی

    ....   گورگی برسی  .....

    کە لە قادرمەی تەیارەکە دابەزیت هەر وەک جارانی پێشو تر  کۆمەڵێ برادەر و کەسە دەوڵەمەنەکانت لەو بەرەوە  دەستێکیان بۆ ڕاوەشاندیت وبە ڕویەکی خۆشەوە چاوەڕێیت بون بگەیتە لایان .
    لەبەر  ساردو سەرمای دەرەوە زۆر بە خێرایی  سەر و ماچیان کردیت و بردیتیانە نزیک ئەو ئۆتۆمبیلەی کە بۆیان ڕێک خستبوی .
    شۆفێری ئۆتۆمبیلەکەت  برازاکەت بوو زو زو لایەکی بۆ ئەکردیتەوە و بە دەم و چاوێکی گوناحەوە داوای دوعای خێری ئەکرد لێت هەواڵی ئاو هەوای مەککە و مەدینەی ئەپرسی لێت .
    کە گەشتیتە بەردەم دەرگاکەی ماڵی خۆتان دوو پیرەژن و کوڕێکی هەرزەکار دەوریان دایت و سەرشانیان ماچ کردی . خوا خوات بوو زو لە کۆڵت بنەوە . بۆیە .داوای لێبوردنت لە هەرهەمویان کرد و بە بیانوی  ئەوەی کە ماندوی ڕێگایت ئیزنت لێ خواستن بەتەنیا بەجێت بهێڵن  . تا بەیانی سەعات یانزە کەس نەیە بۆ خزمەتت .
    لە ژوری نوستنەکەت نیوسەعات لێی پاڵ کەوتیت و دواتر تەلەفونێکت بۆ هاوڕێکەت کرد .

    🔴 چۆنی حەمە سەعی
     لە کوێی ؟ هەر ئێستا وەرە بۆلام بۆ ماڵەوە . دوانەکەوی .دەی خوات لەگەڵ .

    پاش نیوسەعات زەنگی دەرگاکە لێدراو  تەلەفونێکیشت بۆ هات

    🔴 ئەلوو کاکە حاجی گیان
     ئەوە لەبەردەرگام بۆم بکەرەوە
    تەلەفونەکەت  داخستەوە و پەنجەیەکت نا بە دوگمەی کۆنترۆلی دەرگاکەتان .
    پاش نیو دەقە حەمەسەعی  دەرگای ژورەکەتی کردەوە و سڵاوێکی لێ کردی . تۆش بە ساردیەکەوە جوابت دایەوە .
    پاش هەنێ قسە کردن و هەڵچون و قسەی بەرز و نزم و وشەی نەشیاو تورەکەکەی بەرباخەڵت دەرهێنا و 225لیرەی عەیارە 24خەلیجی ترت خستە بەردەمی و بە دەنگێکی بەرزەوە پێت وت ((حەمە سەعی ئەوە 225لیرەکە یە . بەهەمویەوە کردیە 400لیرەی عەیارە بیست وچوار . ئیتر یەک فلست لای من نەماوە .ئێستا خوشکەکەت ئەبێتە دەزگیرانم . هەر ئێستا تەلەفونیش بکە بۆ مەلایەکی خزمی خۆت با لێم  مارە بکات ))

    حەمە سەعی لە خۆشیاندا دەم و چاوی گەشابویەوە و شوێنی بە خۆی نەئەگرت . خێرا تەلەفونێکی بۆ مەلاکەی هاوڕێی کردو و پاش سەعاتێک کچە  حەڤدە ساڵەکەی لە حاجی برادەری مارە کرد و هەر ئەو سەعاتەی کە مامۆستا ڕۆشتەوە . ئەمانیش بەرەو ئوتێلێکی حەوت ئەستێرەیی دەرەوەی شار ڕۆشتن و دوای هەفتەیەک ڕابوردن گەڕانەوە .

    ن : عوسمان قادر نادر
    سلێمانی 14 , 1 ,  2019

    • کۆمێنتی بلۆگەر
    • کۆمێنتی فەیسبووک
    Item Reviewed: گورگی برسی Rating: 5 Reviewed By: Hataw
    Scroll to Top