• نوێترین بابەت

    بوونەوەرە ئاسمانیەکان  پاسۆرد چیە ؟

    بوونەوەرە ئاسمانیەکان 

    پاسۆرد چیە ؟


    ١- تۆماس هۆبز بەتەواوی لەو "دەسەڵاتە " سروشتیە دەترسێت کە ڕۆژێک دەشێت دەست مرۆڤ بکەوێت . بەواتایەکیتر دەسەڵاتی سروشت " مەرگ و ژیانە " و وردە
    ترسەکانی دیکەش لەم دەسەڵاتە دژبەیەکەی سروشت کۆبوونەتەوە . کەوایە دەزانین
    ترسی مرۆڤ لە دەسەڵاتە سروشتیەکان جیاوازە لە ترسی مرۆڤ لە دەسەڵاتە بان سروشتیەکان ، ئەو دەسەڵاتەی کە دەکرێت لەلایان بوونەوەری دیکەوە مامەڵە بکرێن.
    بە قەولی تۆماس هۆبز مرۆڤ سەروەختایەک " کۆمەڵگە " دروستدەکات کە دەترسێت و دەزانێت پیویستی بە ڕێژەی زۆری هاوجنسی هەیە تا لەو ترسە ڕزگاری
    بێت ، کۆمەڵگە بەرهەمی ترس و دڵەڕاوکێکانی مرۆڤە لە سروشت و ئەگەرەکانی سروشت . بەڵام لەم سەرو بەندەشدا مرۆڤ بەردەوام هەموو کار و ئەرکە نهێنیەکانی و شاردنەوەی ویستەکانی لە سروشت لە ڕێگەی ڕاز و ڕەمزەوە " پاسۆرد " دەشارێتەوە و درێژە بە ئەگەر نهێنیەکانی سوبێکت دەدات تا هەمووی وەک ئەوەی هەیە کەشف نەبێت ، بنەڕەتی هەموو کۆمەڵگەیەکیش " پاسۆردە " چوونە ناو هەرکۆمەڵگەیەک و درێژەدان بە گۆڕینی سەرزەمینەکان ، هاوشانە لەگەڵ گۆڕینی
    بەردەوامی پاسۆردەکان لە سیستمی سیاسی و ئابوری کۆمەڵگەی خۆرئاوایی و تاڕادەیەکیش خۆرهەڵاتیدا .



    ٢- کۆمەڵگەی " سەرمایەداری " و بنەمای بزسنسەکانی جۆرە پاسۆردێکی تایبەتە ،
    ڕوونتر بڵێم لە کۆمەڵگەی سەرمایەداریدا مرۆڤ زیاتر خۆی ئامادە دەکات بۆ ئەوەی
    ئەویش خاوەنی پاسۆرد بێت و بەم جۆرەش ئیدی پاسۆرد و ڕەمزەکانی هێندە شۆک نین و لە وەزیفە ئوستورەیەکەیان داماڵدراون . مۆدێرنە و سەرمایەداری مۆدێرنە
    بریتیە لەوەی " بوونەوەرە ئاسمانیەکان " بهێنێتە شوێنی دەسەڵات و ئەگەر سروشتیەکان . ئیدی مرۆڤ لە ڕێگەی لاپتۆپەکەیەوە ئاگایی لەوەیە لە مۆزەمبیق
    چی دەگوزەرێت و چ کارەساتیکی سروشتی ڕویداوە ، هاوکات لە ڕێگەی سۆشیاڵ
    میدیاوە دەسەڵات و ڕوداوە سروشتیەکان وەک شتێکی خەیاڵی و مەجازی سەیر دەکرێت و دەچێتە قاڵبی " ئەفسانەی مۆدێرنەوە ." بنەماکانی پاسۆرد لە سیاسەت و
    ئابوری سیاسی و دەزگا سیخوڕیەکانەوە درێژ دەبێتەوە بۆ بوونەوەرێکی ترساوی
    سەرلاپتۆپێک ، بەمەش هەمووان چاوەڕوانی ئەگەرێکیدیکەن لە دوای ئەگەر سروشتیەکانەوە و تێدەگەین هەموومان نهێنیمان هەیە لەم جیهانەی ئێستادا و هەمووشمان خەسڵەتەکانی سیخوڕ بوون و کۆبوونەوەی کۆمەڵگەی " هۆبزی "
    بۆ کۆمەڵگەیەکی مەجازی مۆدێرنە وەک پێویستیەک دەبینین ، ئامیرەکان و
    سیخوڕی نهێنی و وەهمی و سینەماکان و داتای کۆمپانیاکان ئەو بوونەوەرە
    ئاسمانیانەنن کە ئیدی سەروکارمان لەتەکیاندا هەیە .




    ٣- پاسۆرد بریتیە لە کۆد و شیفرە ، بریتیە لە زمانێکی میتافۆڕ و لێک ترازاو ، کە بۆ شیکردنەوەیان دەبێت یان هاوبەشی هەمان پاسۆرد بیت یاخود ماتماتیک زانێکی
    باش بیت . ئیدی لە ئەشکەوتەکاندا پاسۆرد نیە بۆ ترس و تۆقین و قوربانیدان و ڕاوکردن ، بەڵکوو پاسۆردەکان دەبن بە شتی زۆر تاکە کەسی ، هەموو مرۆڤێک
    پاسۆردی خۆی هەیە و لەڕێگەی ئەم پاسۆردەوە دەچێتەوە ناو ئەرشیف و یادەوەریە
    نهێنیەکانی ، بەڵام ئەم جۆرە پاسۆردە تایبەتە ڕاستەوخۆ پەیوەندی بە بوونەوەرە
    مۆدێرنانەوە هەیە کە ئەترسین بێنە ناو پاسۆردەکانمان و بیان شکێنین ، ئەترسین
    ئەو جیهانە تایبەتیەیی ئێمە ببڕن و هەموو نهێنیەکانمان کەشف بکەن ، ئەترسین
    لەڕاز و نیهانی ناخمان تێبگەن . بوونەوەرە ئاسمانیەکان " ئەلکترۆنەکان " دەست
    بەسەر هەموو خەیاڵ و میشکماندا بگرن .
    نووسینی: شەنگار سابیر



    • کۆمێنتی بلۆگەر
    • کۆمێنتی فەیسبووک
    Item Reviewed: بوونەوەرە ئاسمانیەکان  پاسۆرد چیە ؟ Rating: 5 Reviewed By: Hataw
    Scroll to Top