• نوێترین بابەت

    ئایا سلێمانی پارتی ئیمتیحان ئەكات ؟

    ئایا سلێمانی پارتی ئیمتیحان ئەكات ؟
    نووسینی لقمان بیارەیی

    تا ڕوخانی ڕژێمی سەددام كوردستانی باشور مەترسی جیددی نەبوو بۆ سەر ئاسایشی وڵاتانی دەوروبەر بەتایبەت ئێران , بەڵام پاش ڕوخانی سەددام و بەشداری كارای كورد لە سیستمی حوكمڕانی عێراق و پێگەی بەهێزی لە دەستورە نوێیەكەیدا ئیران هەستی بە پێشهاتنی مەترسیگەلێكی جیددیكرد لەم هەرێمە دانپێدنراوەی عێراق .
    هەرێم بە پشت بەستن بەو مافانەی كە لەدەستوردا پێی درابون بە تایبەت لە بواری ئابوری بودجەدا , توانی بوژانەوەیەكی بەرچاو بەخۆوە ببینێ و لە فەترەیەكی زەمەنی كورتتدا سەرنجی هەزاران كۆمپانیای بیانی لەبوارە جیاجیاكاندا بۆ وەبەرهێنان بۆ لای خۆی ڕابكێشێ , بەمەش ئاوەدانیەكی خێرا و بەرزبونەوەیەكی بەرچاو لە داهاتی ساڵانە و ڕۆژانەی تاك و دابەزینی ڕێژەی بێكاری وە فەراهەمبونی زۆرێك لە خزمەتگوزاریەكان بە شیوەیەكی سەر سوڕهێنەر گەشەیانكرد بەجۆرێك كە هەرێم هیچ شتێكی لەو وڵاتە نەئەچوو كە عێراقە , ئەمە جگە لە بەرزبونەوەی ئاستی بە مەدەنیبونی كۆمەڵگەی كورد و فەراهەمبونی ئازادیەكان بە گشتی .
    حكومەتی هەرێم لەو فەترە زێڕینەدا هەوڵیدا ئیستیسماری سیاسی بەو پێشكەوتن و ئاوەدانیەوە بكات بۆ زیاتر كرانەوە بە ڕوی ڕای گشتی جیهان و ناساندنی مەزڵومیەتی قەزیەی كورد وە ناڕاستەوخۆ پێیان بڵێ ئەها گەلی كورد گەر دەرفەتی بدرێتێ ئەتوانێ عامیلێكی خێر و ئینسانێكی سودمەند بێت بۆ ژیان بۆ مرۆڤایەتی .
    ئێران چیكرد ?!
    ئێران هەمیشە پێی وابووە بۆ ئەوەی تاكی ڕۆژهەڵاتی كوردستان ئینتیمای نەتەوەیی بەرەو لاوازبون بچێت و ڕۆژێك لە ڕۆژان بیر لە ڕاپەڕین نەكاتەوە , پێویستە هەرێمی كوردستان نائارام بێت گەندەڵی بەرچاو لە حوكمڕانیەكەیدا هەبێت , خزمەتگوزاریەكانی تا ئاستی ئاووكارەبا سنورداربن , گەنجەكانی لە بازاڕەوە تا زانكۆ بێ مەعریفە و بێ بەرهەم بن , ژیان بەشیوەیەكی گشتی سەخت بێت .
    لەبەرچی ?!
    لەبەر ئەوەی بەشێوەیەكی ناڕاستەوخۆ بە كوردستانی ڕۆژهەڵات بڵێ ئەوەیە بەرهەمی ڕاپەڕین ئەوەیە حوكمڕانی كوردی , وە بۆ نزیكبونەوەی زیاتر لە ئامانجە سیاسیەكەی كاری لەسەر تۆخكردنەوەی ململانێی پارتی و یەكێتی كرد , سەرەتا لە بە ڕۆتینیكردنی تێكەڵكردنەوەی هەردوو ئیدارەی سلێمانی و هەولێری حكومەتی هەرێمەوە دەستیپێكرد وە پاشان سەرقاڵكردنی حیزبەكانی تریش هاوشێوەی یەكێتی بە پارتیەوە تا لە پەنایاندا سلێمانی لەڕوی پێشكەوتنی ئابوری و خزمەتگوزاری حكومیەوە چەندین ساڵ بخاتە پاش هەولێر بەمەش سلێمانی بۆ شل ببێ تا بیكاتە غورفەی عەمەلیاتی سیاسی و ئیتڵاعاتی خۆی بۆ لێدان لە ئارامی و ئاوەدانی و نێوبانگ و پێگەی سیاسی هەرێمی كوردستان .
    پارتی چیكرد ?!
    پارتی سەرەتا ویستی پڕۆژە سیاسی و ئابوری و خەدەمیەكانی تەنها لەسنوری زۆنی خۆی نەمێننەوە و ڕۆتینی دووئیدارەیی كاڵبكاتەوە بەڵام ڕیگری لێكرا تەنانەت هەوڵیشدرا نەتوانێ لەژێر دەستەڵاتی خۆیدا جێ بەجێیان بكات بەڵام پارتی بۆ ئەوەی بتوانێ ستراتیجی خۆی لەژێر دەستەڵاتی خۆی جێ بەجێبكات ناچاربوو هەموو ئەو حیزبانەی كە لەژێر ناوی ئۆپۆزسیۆنبوندا سیاسەتی وەكالەتیان پەیڕەو ئەكرد بترنجێنێتە سلێمانی , ئیتر وردەوردە تا ئاستێكی بەرچاو سنوری دەستەڵاتی پارتی بەتایبەت هەولێر گەشەی كرد , لەولاشەوە حیزبەكانی سلێمانی بە قیادەی یەكێتی و بە موخەتەت گرفتە ئیداری و ئابوریەكانی سلێمانیان ئەخستە ئەستۆی پارتی ئەمەش لەپێناو ئەوەی لەیەك كاتتدا هەم بەرپرسیاریەتی لەسەر خۆیان لابدەن وە هەم پارتیش لای خەڵكی سلێمانی ناشیرین بكەن , ئەمە لەكاتێكدا بودجەی هەرێم لەسەر بنەمای ڕێژەی دانیشتوانی زۆن(زەرد - سوز)دابەش ئەكرا كە %43 بۆ سەوز و %57 یش بۆ زەرد .
    سیاسەتی گەوجاندنی حیزبەكانی سلێمانی ململانێی سیاسی بردە قۆناغێكی ترسناك و شۆڕیانكردەوە بۆ سەرشەقام كە ئەویش دژایەتیكردنی بەئەنقەستی پارتیبوو , كارگەشتە ئەوەی سلێمانی بونی خۆی لە تێكچونی هەولێر ببینێتەوە , حیزبەكان گەشەی خۆیان لەسەر بچوكبونەوەی پارتی ببیننەوە تەنانەت ئەندامەكانیشیان شكۆی خۆیان لەڕەزیلبونی پارتیەكان ببیننەوە , خولاسەی كەلام ئیرهابێكی فیكری مونەزەمیان دەستپێكرد .
    كەمتەرخەمی پارتی .......
    پارتی جا لەبەر ئەسبابی سیاسی بوو كە مەسئولیەتی ئەخلاقی كوردستانی لەسەر شانبووە وە لەسەر شانیشیەتی یان نەزانینبوو كە دەستوەستاو بوو لەبەرامبەر ئەو ئیرهابە فیكریەدا , مەخسەدم ئەوەیە كە من پێموایە شكستی خوارد لەگەیاندنی پەیام و ستراتیجی سیاسی و ئابوری خۆی بە ڕای گشتی كوردستان و بەتایبەت سلێمانی , ئاخر كاتێك(عەلی حەمەساڵەح)بە ماشێن حیسابێكەوە ئەهاتە سەرشاشە و بە تەوزیعكردنی بەتانی پڵنگ عاتیفەی خەڵكی ئەجوڵاند پارتی هیچ حیسابێك و هیچ وەڵامێكی جیددی ڕیكخراوی نەبوو بۆی , ئیتر خەڵكیش ئەو بیدەنگیەی بە دەلیلی ڕاستی بەرنامە ماتماتیكیەكە و زەرب و تەقسیمەكەی عەلی حەمەساڵەح ئەزانی , ئیتر چۆن عەرەب ئەڵێ(السكوت علامة الرضا) .
    لەمەودوا پارتی چیبكات ?
    لە ئێستاوە كە فشارەكانی ئەمریكا و هاوپەیمانەكانی بەهۆی بەرنامە ئەتۆمیەكەیەوە بۆ سەر ئێران چڕ بۆتەوە , پێویستە پارتی خۆی ئامادە بكات بۆ قۆستنەوەی هەر فەراغێكی ئێرانی لە سلێمانی , لەپاڵ ئەمەشدا لەمەودوا شەفافانە و ڕاستەوخۆ دیالوگ لەگەڵ خودی خەڵكی سلێمانی بكات نەك لەگەڵ حیزبەكانی , پێیان بڵێ من مەعسوم نیم لە هەڵە و كەموكوڕی بەڵام باشی ناو خراپەكانم , گەر ئێوە پشتگیریم بكەن ئەتوانم لەیەك كاتتدا هەم جیگەی تموحی ئێوە بم هەم خۆشم باشتربكەم , پێیان بڵێ پێویستە خۆتان ڕابەرایەتی خۆتان بكەن خۆتان شاری خۆتان خزمەت بكەن , من تەنها پشتگیریتان ئەكەم دەست لەكاروبارتان وەرنادەم , بە گەنجەكانی بڵێ بە ئاگا وەرنەوە من خەمخۆری ئێوەم , تموحەكانتان هەرچیەك و هەر چەند ببن بە پشتگیری من دینە دی , پێیان بڵێ من لە ئێوەم و ئێوەش لەمنن .
    لە كۆتاییدا پێموایە سلێمانی ئیللا ئەبێت بەهاوكاری پارتی خۆی لەژێر چنگی ئیرهابی فیكریدا قوتار بكات وە گەر بەناچاریش بێت پارتی ئیمتیحان بكات , لەبەرامبەریشدا پارتیش لە ئێستاوە سەعی بكات تا لەو ئیمتیحانە دەربچێت .

    نووسینی:لقمان بیارەیی

    • کۆمێنتی بلۆگەر
    • کۆمێنتی فەیسبووک
    Item Reviewed: ئایا سلێمانی پارتی ئیمتیحان ئەكات ؟ Rating: 5 Reviewed By: Hataw
    Scroll to Top