• نوێ

    لەعەفەرین ژن قەڵغانە

    لەعەفەرین ژن قەڵغانە

    پەنجەکانم بۆ گرتنی قەڵەمێک و
    چنینی کەزی شیعرم کەوتونەتە هەلەکەسەما..
    غیرەتی شێرە ژنێکی عەفرین
    چڕنۆکێکی تیژە
    سینەم لە ترس هەڵدەدڕێ،
    ئەپرسم خودا؟!
    سەدان هیتلەری کوێر و کەڕو ڵاڵت
    بۆ لەم گۆڕستانە خوڵقاند؟!
    بۆچی  بیرەنەوتی بێ بنت
    لە ژێر پێیاندا تەقاند؟!
    ۰ نازانی ئەم خاوەن ڕەنگانە،
    بۆچەند پارچە کاغەزێک
    ئەمان کەن بەکۆیلەو
    خۆشیان زوحاکی چوارشانە؟!

    بە منداڵەکانمان ئەوێرن؟!
    باوی سێو نەما،
    ئێستا تۆپی لاستیکیان لێ ئەکەن بەئاسن و
    بەبۆنی خەردەل گوڵە نێرگزەکان بەخێو ئەکەن؟!
    زۆر ئارەزووتان داهێنانە؟!
    لە ئەندێشەی پوخەڵتاندا
    دەنگی گریان و تۆپ و تفەنگ...
    چەقەچەقی گولە و سینەو مەمکی شەڕڤانان
    و عەقڵی گەریلاکانمان ئامانجتانە؟!
    بەچێژترین ئاوازو داهێنانتانە؟!
    بوکەڵەی دەست کچۆڵەکەو ڕۆحی
    دایکیتان دزی و لاشەتان  لەباوەشیا دانا؟!
    بەرز دەفڕن فاشستینە بەرز دەفڕن!!
    باڵەکانتان گوناحی بێ ویژدانیتان هەڵناگرێ،دەشکێ
    ئەم کوردستانە..کە لای ئێوە گۆڕستانە
    لێتان هەڵدەگەڕێتەوە و دەبێ بەئاگر
    ئاگرێ هیچ زوحاکێک لەبەریا خۆی ناگرێ
    بەر ناگرێ ئەم زوڵمانە
    هاتوون ئەڵێن
    ئێمەین تفەنگ لەشان و
    شاخ ناس
    نییە لەعالەما لەئێمە پاکتر
    ڕاستگۆتر لەهەموو ئەجناس!
    لەولا دانیشتوون،سەر لەناودەست
    شینیانە بەدرۆ بۆ یادی پێنج هەزار
    پەپولەی بەهەشت.
    ئامادەن  عەفرین شەهید بکرێ و
    ساڵێکی تر لەولاشەوە دانیشن بۆ ئەم یادە
    کەچی نایەنەوێ دەنگ هەڵێنن،
    بۆ عەفرینم نایەنە دەنگ.
    قەڵەم بشکێ
    گەر شۆڕشێکی پێ دەسگیر نەبێ
    کورد بیت و تەنیا تەماشاکەری ئەتکی وڵاتت بی
    یاخوا لار بی..!!
    هاوار بگەیەنینە کوێ،
    کە  تیغی زوبانی سەرکردەم
    لەگەڵ زوبانی دووژمنا بێ.
    ئێمە لێرە هاوارمان بێ بۆ عەفرینم
    ئەوانیش دەستیان لەنێو باغەڵ و دەستی یەکا بێ

    "نەورەس محمد"

    • کۆمێنتی بلۆگەر
    • کۆمێنتی فەیسبووک
    Item Reviewed: لەعەفەرین ژن قەڵغانە Rating: 5 Reviewed By: hataw magazin
    Scroll to Top